നിങ്ങളുടെ നിത്യത നിര്‍ണ്ണയിക്കുന്ന ആത്മീയ ഭക്ഷണക്രമം

ഭക്ഷണ ശീലങ്ങള്‍, ഇടവിട്ടുള്ള ഉപവാസം, ശുദ്ധമായ ആഹാരരീതി എന്നിവയാല്‍ ഭ്രമിച്ചുപോയ ഒരു ലോകത്ത്, പലപ്പോഴും ശ്രദ്ധിക്കപ്പെടാതെ പോകുന്ന ആഴത്തിലുള്ള ഒരു വിശപ്പുണ്ട് - അത് ആത്മാവിന്‍റെ വിശപ്പാണ്. ക്രിസ്ത്യാനികളെന്ന നിലയില്‍, നമ്മുടെ പാത്രത്തിലുള്ളത് മാത്രമല്ല, നമ്മുടെ ആത്മാവിനെ പോഷിപ്പിക്കുന്നത് എന്താണ് എന്നതും പ്രാധാന്യമുള്ളതാണ്. നാം അത് തിരിച്ചറിഞ്ഞാലും ഇല്ലെങ്കിലും, നാം എപ്പോഴും ഒരു ഭക്ഷണക്രമത്തിലാണ്. ചോദ്യം ഇതാണ്: നിങ്ങള്‍ നിങ്ങളുടെ ആത്മാവിനെയാണോ അതോ ജഡത്തെയാണോ പോഷിപ്പിക്കുന്നത്?

1 പത്രോസ് 1:14 പറയുന്നു,

"പണ്ടു നിങ്ങളുടെ അജ്ഞാനകാലത്ത് ഉണ്ടായിരുന്ന മോഹങ്ങളെ മാതൃകയാക്കാതെ

നിങ്ങളെ വിളിച്ച വിശുദ്ധന് ഒത്തവണ്ണം അനുസരണമുള്ള മക്കളായി എല്ലാ നടപ്പിലും

വിശുദ്ധരാകുവിൻ".

നമ്മുടെ ആഗ്രഹങ്ങള്‍ നിഷ്പക്ഷമല്ലെന്ന് ഇത് നമ്മെ ഓര്‍മ്മിപ്പിക്കുന്നു - അവ ഒന്നുകില്‍ ജഡത്തെ തൃപ്തിപ്പെടുത്തുന്നു അല്ലെങ്കില്‍ ആത്മാവിനെ പരിപോഷിപ്പിക്കുന്നു.

1. ജഡത്തിന്‍റെ ജീവനാശകമായ ഭക്ഷണക്രമം.

നിങ്ങള്‍ ജഡത്തെ പോഷിപ്പിക്കുമ്പോള്‍, നിങ്ങള്‍ നിങ്ങളുടെ ആത്മാവിനെ പട്ടിണിയിലാക്കുന്നു. അത് വെറും കാവ്യാത്മകമായ ഭാഷയല്ല - അത് നിത്യമായ പരിണിതഫലങ്ങളുള്ള ഒരു ആത്മീയ യാഥാര്‍ഥ്യമാകുന്നു. ജഡം എപ്പോഴും ആശ്വാസം, സന്തോഷം, ശ്രദ്ധ, താല്‍ക്കാലിക ഉന്നതികള്‍ എന്നിവയ്ക്കായി കൊതിയ്ക്കുന്നു. അത് പോഷിപ്പിക്കപ്പെടുന്നത്:

അഹങ്കാരം: "ഏറ്റവും നല്ലത് എന്തെന്ന് എനിക്കറിയാം"
മോഹം: "എനിക്ക് അത് ഇപ്പോള്‍ വേണം".
കോപവും കയ്പ്പും: "അവര്‍ ഇത് അര്‍ഹിക്കുന്നു".
ഭോഷ്ക്: "ഞാന്‍ സത്യത്തെ വളച്ചൊടിയ്ക്കും".
പരദൂഷണം: "ഞാന്‍ കേട്ടത് എന്താണെന്ന് ഞാന്‍ നിന്നോട് പറയാം . . . ".

ഈ ആഗ്രഹങ്ങള്‍ക്ക് നിങ്ങള്‍ വഴങ്ങുമ്പോഴെല്ലാം, നിങ്ങളെ ദൈവത്തില്‍ നിന്നും അകറ്റാന്‍ രൂപകല്‍പ്പന ചെയ്ത ഒരു വ്യവസ്ഥിതിയെ ഇന്ധനമാക്കുകയാണ് നിങ്ങള്‍ ചെയ്യുന്നത്. റോമര്‍ 8:13 ഇങ്ങനെ മുന്നറിയിപ്പ് നല്‍കുന്നു,

"നിങ്ങൾ ജഡത്തെ അനുസരിച്ചു ജീവിക്കുന്നു എങ്കിൽ മരിക്കും നിശ്ചയം. . ."

ശക്തമായ വാക്കുകള്‍. എന്നാല്‍ എന്തുകൊണ്ട്? കാരണം ജഡം നിയന്ത്രണത്തെ ആഗ്രഹിക്കുന്നു, അത് എല്ലായിപ്പോഴും ആത്മാവിനെ എതിര്‍ക്കും (ഗലാത്യര്‍ 5:17).

2. നിങ്ങള്‍ ദൈവത്തില്‍ നിന്നും ഓടിപ്പോകുമ്പോള്‍, സാത്താന്‍ ഒരു വാഹനം അയയ്ക്കുന്നു.

ഗൌരവമേറിയ ഒരു സത്യമുണ്ട്: ദൈവത്തിങ്കല്‍ നിന്നും നിങ്ങള്‍ ഓടിപോകുവാന്‍ തീരുമാനിക്കുമ്പോഴെല്ലാം, ശത്രു അതിനുള്ള ഗതാഗതസൗകര്യം പോലും നല്കിതരാന്‍ തയ്യാറാണ്.

എതിര്‍ദിശയിലേക്ക് പോകുന്നതായ ഒരു കപ്പല്‍ യോന കണ്ടതുപോലെ (യോന 1:3), പാപം ചെയ്യാനുള്ള അവസരങ്ങള്‍, നിരുപദ്രവകരമെന്ന് തോന്നുന്ന വ്യതിചലനങ്ങള്‍, കലഹിക്കാന്‍ പ്രോത്സാഹിപ്പിക്കുന്ന ആളുകള്‍ എന്നിവയെ നിങ്ങളും കണ്ടെത്തും. എന്നാല്‍ വഞ്ചന ഇതാണ് - കലഹിക്കാന്‍ സാത്താന്‍ നിങ്ങള്‍ക്ക് സഹായധനം നല്‍കുന്നു. നിങ്ങള്‍ സ്വയമായി നിര്‍മ്മിക്കുന്ന ഒരു കൊടുങ്കാറ്റില്‍ കുടുങ്ങിപ്പോകുന്നതുവരെ അവന്‍ അത് എളുപ്പവും, രസകരവും, ന്യായീകരിക്കാവുന്നതുമാക്കുന്നു.

ഓര്‍ക്കുക: സൗകര്യം എന്നത് സ്ഥിരീകരണമല്ല. ഒരു വാതില്‍ തുറക്കപ്പെട്ടതുകൊണ്ട് ദൈവമാണ് അത് തുറന്നത് എന്ന് അര്‍ത്ഥമില്ല.

3. ആരോഗ്യകരമായ ഭക്ഷണക്രമം പിന്തുടരുക.

ചികിത്സ ലളിതമാണ് എന്നാല്‍ ശക്തവുമാണ്:

അനുദിനവും ദൈവവചനം ഭക്ഷിക്കുക. നിങ്ങളുടെ ശരീരത്തിനു പോഷണം ആവശ്യമുള്ളതുപോലെ, നിങ്ങളുടെ ആത്മാവ് തിരുവചനത്തിനായി കൊതിക്കുന്നു. കര്‍ത്താവായ യേശു പറഞ്ഞു,

"അതിന് അവൻ: “മനുഷ്യൻ അപ്പംകൊണ്ടു മാത്രമല്ല, ദൈവത്തിന്‍റെ വായിൽകൂടി വരുന്ന സകല വചനംകൊണ്ടും ജീവിക്കുന്നു”

എന്ന് എഴുതിയിരിക്കുന്നു എന്ന് ഉത്തരം പറഞ്ഞു". (മത്തായി 4:4).

പിശാചിനെ അകറ്റിനിര്‍ത്താന്‍ ഓരോ ദിവസവും കേവലം ഒരു വാക്യം മാത്രം വായിക്കുക എന്നല്ല ഇത് അര്‍ത്ഥമാക്കുന്നത്. സത്യത്തെ അയവിറക്കുക, ജ്ഞാനത്തെ ഉള്ളിലാക്കുക, ദൈവീകമായ വെളിപ്പാടിനാല്‍ രൂപാന്തരപ്പെടുക എന്താണ് ഇതിന്‍റെ ഉദ്ദേശ്യം.

ഇതോടുകൂടെ ആരംഭിക്കുക:

സങ്കീര്‍ത്തനം 1: യഹോവയുടെ ന്യായപ്രമാണത്തില്‍ സന്തോഷിക്കാന്‍ പഠിക്കുക.
സദൃശ്യവാക്യങ്ങള്‍: അനുദിനവും തീരുമാനം എടുക്കുന്നതിനുള്ള പ്രായോഗീകമായ ജ്ഞാനം നേടുക
സുവിശേഷങ്ങള്‍ : യേശുവിന്‍റെ ഹൃദയം മനസ്സിലാക്കുക
റോമര്‍: ക്രിസ്തുവിലുള്ള നിങ്ങളുടെ വ്യക്തിത്വത്തെ മനസ്സിലാക്കുക.

നിങ്ങളുടെ ആത്മീകമായ വിശപ്പ് വര്‍ദ്ധിക്കുമ്പോള്‍, ജഡീകമായ കൃത്രിമ ഭക്ഷണത്തോടുള്ള നിങ്ങളുടെ ആസക്തി കുറയുവാന്‍ ഇടയാകും.

4. നിങ്ങളുടെ ഭക്ഷണക്രമം നിങ്ങളുടെ ലക്ഷ്യസ്ഥാനത്തെ നിര്‍ണ്ണയിക്കുന്നു.

എല്ലാ ദിവസവും, നിങ്ങള്‍ക്ക് ഒരു തിരഞ്ഞെടുപ്പുണ്ട്:

ജഡത്തെ പരിപോഷിപ്പിച്ച് നിങ്ങളുടെ ആത്മാവിനെ പട്ടിണിയിലാക്കുക, അല്ലെങ്കില്‍ നിങ്ങളുടെ ആത്മാവിനെ പരിപോഷിപ്പിച്ചുകൊണ്ട്‌ ജഡത്തെ ക്രൂശിക്കുക. അതിന്‍റെ ഫലം കേവലം ആത്മീയത മാത്രമല്ല - അത് നിങ്ങളുടെ ബന്ധങ്ങളെയും, വികാരങ്ങളേയും, തീരുമാനങ്ങളേയും, പൈതൃകത്തേയും ബാധിക്കുന്നു.

ഇന്ന് ഒരു പരിശോധന നടത്താന്‍ തയ്യാറാകുക:

എന്താണ് നിങ്ങള്‍ കാണുന്നത്?
എന്താണ് നിങ്ങള്‍ കേള്‍ക്കുന്നത്?
എന്തിനെക്കുറിച്ചാണ് നിങ്ങള്‍ ധ്യാനിക്കുന്നത്?
എന്താണ് നിങ്ങള്‍ സംസാരിക്കുന്നത്?

കര്‍ത്താവായ യേശു പറഞ്ഞതുപോലെ,

"നീതിക്കു വിശന്നു ദാഹിക്കുന്നവർ ഭാഗ്യവാന്മാർ; അവർക്കു തൃപ്തിവരും". (മത്തായി 5:6).

അതുകൊണ്ട്, എന്തിനുവേണ്ടിയാണ് നിങ്ങള്‍ക്ക് വിശക്കുന്നത്?

Bible Reading: Isaiah 61-64

നിങ്ങളുടെ നിത്യത നിര്‍ണ്ണയിക്കുന്ന ആത്മീയ ഭക്ഷണക്രമം

Most Read