അഗ്നി ഇറങ്ങണം

ലേവ്യാപുസ്തകം 6:12-13 നമ്മോടു പറയുന്നു, "യാഗപീഠത്തിൽ തീ അണഞ്ഞുപോകാതെ കത്തിക്കൊണ്ടിരിക്കണം; പുരോഹിതൻ ഉഷസ്സുതോറും അതിന്മേൽ വിറകു കത്തിച്ച് ഹോമയാഗം അടുക്കിവച്ച് അതിനുമീതെ സമാധാനയാഗങ്ങളുടെ മേദസ്സു ദഹിപ്പിക്കണം. യാഗപീഠത്തിന്മേൽ തീ അണഞ്ഞുപോകാതെ എപ്പോഴും കത്തിക്കൊണ്ടിരിക്കണം".

എന്താണ് ഒരു യാഗപീഠം?
കൈമാറ്റം നടക്കുന്ന ഒരു സ്ഥലമാണ് യാഗപീഠം. ആത്മീകവും സ്വാഭാവീകവും തമ്മിലുള്ള കൂടിക്കാഴ്ചയുടെ ഇടമാണത്, ദൈവീകവും മാനുഷീകവുമായ കൂടിച്ചേരലുകളുടെ സ്ഥലമാണ്. ദൈവം മനുഷ്യരെ കണ്ടുമുട്ടുന്ന സ്ഥലമാണ് ഒരു യാഗപീഠം. 
വിധികള്‍ മാറ്റിയെഴുതപ്പെടുന്ന സ്ഥലമാണ് ഒരു യാഗപീഠം എന്നത്.

പഴയമിയമത്തില്‍, യാഗപീഠം എന്നത് ഭൌതീകമായ ഒരു സ്ഥലമാണ്. നിങ്ങള്‍ക്ക്‌ ദൈവത്തെ കണ്ടുമുട്ടണമെങ്കില്‍, അത് നിങ്ങള്‍ക്ക്‌ മറ്റെവിടേയും ചെയ്യുവാന്‍ സാധിക്കയില്ല; നിങ്ങള്‍ ഈ യാഗപീഠത്തിലേക്ക് കടന്നുചെല്ലണം. നിങ്ങള്‍ക്ക് ഒരു യാഗം അര്‍പ്പിക്കണമെങ്കില്‍, യാഗത്തിനായി നിങ്ങള്‍ ഈ സ്ഥലത്ത് പോകണം.

എന്നിരുന്നാലും, പുതിയ നിയമത്തില്‍, യാഗപീഠം എന്നത് ഒരു ആത്മീക സ്ഥലമാണ്. മനുഷ്യന്‍റെ ആത്മാവ് ദൈവത്തിന്‍റെ ആത്മാവിനെ കണ്ടുമുട്ടുന്ന ഒരു സ്ഥലമാണത്. ഇങ്ങനെയുള്ള യാഗപീഠത്തെ സംബന്ധിച്ചു മത്തായി 18:20ല്‍ കര്‍ത്താവായ യേശു വ്യക്തമായി വിശദമാക്കുന്നു, "രണ്ടോ മൂന്നോ പേർ എന്‍റെ നാമത്തിൽ കൂടിവരുന്നിടത്തൊക്കെയും ഞാൻ അവരുടെ നടുവിൽ ഉണ്ട് എന്നും ഞാൻ നിങ്ങളോടു പറയുന്നു". മറ്റൊരു വാക്കില്‍ പറഞ്ഞാല്‍, നിങ്ങള്‍ ഏതു സ്ഥലത്ത് ഇരുന്നുകൊണ്ട് കര്‍ത്താവിന്‍റെ നാമം വിളിച്ചപേക്ഷിക്കുന്നുവോ, ആ സ്ഥലം ഒരു യാഗപീഠം ആയി മാറുന്നു.

യാഗപീഠത്തിനു വേണ്ട മറ്റൊരു ആവശ്യകതയുണ്ട്. ദൈവം പറഞ്ഞു, "യാഗപീഠത്തിന്മേല്‍ തീ എപ്പോഴും കത്തിക്കൊണ്ടിരിക്കണം". തീയില്ലാത്ത ഒരു യാഗപീഠം ദൈവത്തിനു വെറുപ്പായിരുന്നു.

യിസ്രായേല്‍ കര്‍ത്താവിങ്കല്‍ നിന്നും തിരിഞ്ഞപ്പോള്‍, ദൈവത്തിന്‍റെ യാഗപീഠം അവഗണിക്കപ്പെടുകയും തകര്‍ക്കപ്പെടുകയും ചെയ്തു. ദൈവത്തിന്‍റെ യാഗപീഠങ്ങളുടെ മേല്‍ പുതിയ അഗ്നിയൊന്നും ഉണ്ടായിരുന്നില്ല.അതിന്‍റെ ഫലമായി ആ രാജ്യം മുഴുവനും പാപത്തില്‍ വീണുപോയി.

ഈ കാരണത്താലാണ് ദൈവം അഗ്നിയാല്‍ ഉത്തരമരുളി യിസ്രായേല്‍ ദേശത്തെ തന്നിലേക്ക് മടക്കിക്കൊണ്ടുവരുന്നതിനു മുമ്പ്, യാഗപീഠം പുതുക്കിപണിയണമായിരുന്നു. "അപ്പോൾ ഏലീയാവ് ഇടിഞ്ഞുകിടന്ന യഹോവയുടെ യാഗപീഠം നന്നാക്കി". (1 രാജാക്കന്മാര്‍ 18:30).

യാഗപീഠം നന്നാക്കുക എന്നാല്‍ ദൈവവുമായുള്ള നമ്മുടെ ബന്ധത്തെയാണ് കാണിക്കുന്നത്. ദൈവവുമായുള്ള നമ്മുടെ ബന്ധം ദൈവവചനത്തില്‍ കൂടിയും പ്രാര്‍ത്ഥനയില്‍ കൂടിയുമാണ്‌ പണിയപ്പെടുന്നത്.

യാഗപീഠം നന്നാക്കുക എന്നതില്‍ എല്ലാ തരത്തിലുമുള്ള വിട്ടുവീഴ്ചകളില്‍ നിന്നും ശുദ്ധീകരണം പ്രാപിച്ച് നമ്മെത്തന്നെ കര്‍ത്താവായ യേശുവിനു വീണ്ടും സമര്‍പ്പിച്ചുകൊണ്ടുള്ള, നമ്മുടെ ജീവിതത്തിലെ, കുടുംബങ്ങളിലെ, സഭകളിലെ ശരിയായ ആരാധനയുടെ പുനസ്ഥാപനം ഉള്‍പ്പെടുന്നു. ഹോശേയ 6:1 നമ്മെ പ്രബോധിപ്പിക്കുന്നു: "വരുവിൻ നാം യഹോവയുടെ അടുക്കലേക്ക് ചെല്ലുക. അവിടുന്ന് നമ്മെ കടിച്ചു കീറിയിരിക്കുന്നു; എങ്കിലും അവിടുന്ന് സൗഖ്യമാക്കും; അവിടുന്ന് നമ്മെ അടിച്ചിരിക്കുന്നു; എങ്കിലും അവിടുന്ന് മുറിവ് കെട്ടും".