ശീര്‍ഷകം: ദൈവം ശ്രദ്ധിക്കുന്നു

യഹോവ ശമൂവേലിനോട്: അവന്‍റെ മുഖമോ പൊക്കമോ നോക്കരുത്; ഞാൻ അവനെ തള്ളിയിരിക്കുന്നു. മനുഷ്യൻ നോക്കുന്നതുപോലെയല്ല; മനുഷ്യൻ കണ്ണിനു കാണുന്നതു നോക്കുന്നു; യഹോവയോ ഹൃദയത്തെ നോക്കുന്നു എന്ന് അരുളിച്ചെയ്തു. (1 ശമുവേല്‍ 16:7).

ഒരു ദിവസം കര്‍ത്താവായ യേശു ആലയത്തിലെ ഭണ്ഡാരത്തിന്‍റെ എതിര്‍ഭാഗത്തായി ഇരിക്കുകയായിരുന്നു, അപ്പോള്‍ ആളുകള്‍ ഭണ്ഡാരത്തില്‍ എങ്ങനെയാണ് പണം ഇടുന്നതെന്ന് അവന്‍ കണ്ടു. (മര്‍ക്കോസ് 12:41). ആലയത്തിലെ ഭണ്ഡാരത്തില്‍ ആളുകള്‍ നിക്ഷേപിച്ചിരുന്ന പണം മാത്രമല്ല കര്‍ത്താവായ യേശു കണ്ടത്, മറിച്ച് ആളുകള്‍ കര്‍ത്താവിനായി കൊടുത്തപ്പോള്‍ അവരുടെ ഹൃദയത്തിലെ ആന്തരീക മനോഭാവത്തേയും അവന്‍ കണ്ടുവെന്ന് ഞാന്‍ വിശ്വസിക്കുന്നു.

ഒരു വിധവ നല്‍കിയ രണ്ടു കാശ് എന്ന താരതമ്യേന പ്രാധാന്യം കുറഞ്ഞ വഴിപാടിലും കര്‍ത്താവിന്‍റെ കണ്ണുകള്‍ പതിഞ്ഞു എന്നത് ആശ്ചര്യകരമായ വസ്തുതയാകുന്നു. ആ വഴിപാടിന്‍റെ വലിപ്പമല്ല മറിച്ച് ആ വിധവയുടെ മനോഭാവമാണ് കര്‍ത്താവിന്‍റെ ശ്രദ്ധയെ ആകര്‍ഷിച്ചത്. നിങ്ങളുടെ വഴിപാടിന് കര്‍ത്താവിന്‍റെ ശ്രദ്ധയെ ആകര്‍ഷിക്കുവാനുള്ള ശക്തിയും ഉണ്ടെന്ന് ഇത് എന്നോട് പറയുന്നു.

2 ദിനവൃത്താന്തം 16:9 പറയുന്നു, "യഹോവയുടെ കണ്ണു തങ്കൽ ഏകാഗ്രചിത്തന്മാരായിരിക്കുന്നവർക്കുവേണ്ടി തന്നെത്താൻ ബലവാനെന്നു കാണിക്കേണ്ടതിനു ഭൂമിയിലെല്ലാടവും ഊടാടിക്കൊണ്ടിരിക്കുന്നു".

ഇത് ബലഹീനര്‍ക്ക്, ദരിദ്രര്‍ക്ക്, ശക്തിയില്ലാത്തവര്‍ക്ക്, ആവശ്യത്തില്‍ ആയിരിക്കുന്നവര്‍ക്കുള്ള ഒരു വലിയ വാര്‍ത്തയാകുന്നു. നിങ്ങള്‍ക്ക് ഒരു അത്ഭുതം ആവശ്യമുണ്ടോ? നിങ്ങളുടെ ഹൃദയം ദൈവത്തോട് വിശ്വസ്തതയുള്ളതായിരുന്നാല്‍, നിങ്ങളുടെ സാഹചര്യങ്ങളില്‍ ശക്തിയോടെ ഇടപ്പെടുവാന്‍ വേണ്ടി കര്‍ത്താവിന്‍റെ കണ്ണുകള്‍ നിങ്ങളുടെമേല്‍ ഉണ്ടെന്ന് അറിയുക.

നോഹയുടെ കാലഘട്ടങ്ങളില്‍, ഭൂമി ദൈവത്തിന്‍റെ മുമ്പാകെ വഷളായിയെന്നു ദൈവം കണ്ടു. ദൈവം ഭൂമിയെ നോക്കി, അതു വഷളായി എന്നു കണ്ടു; സകല ജഡവും ഭൂമിയിൽ തന്‍റെ വഴി വഷളാക്കിയിരുന്നു. (ഉല്പത്തി 6:11-12).

എന്നാല്‍ നോഹ വ്യത്യസ്തനായിരുന്നു. അവന്‍ ജനക്കൂട്ടത്തിന്‍റെ കൂടെ ഒഴുകിപോയില്ല മറിച്ച് താനും തന്‍റെ കുടുംബവും ദൈവത്തെ അന്വേഷിച്ചു. വേദപുസ്തകം പറയുന്നു, "എന്നാൽ നോഹയ്ക്കു യഹോവയുടെ കൃപ ലഭിച്ചു". (ഉല്പത്തി 6:8).

ആരോ ഇങ്ങനെ പറഞ്ഞിട്ടുണ്ട് ഒഴിക്കിനനുസരിച്ചു നീന്തുവാന്‍ ചത്ത ഒരു മീനിനുപോലും കഴിയും, എന്നാല്‍ ഒഴുക്കിനു എതിരായി പോകുവാന്‍ ജീവനുള്ള മീനിനു മാത്രമേ സാധിക്കുകയുള്ളൂ. ഓരോ ദിവസവും നമുക്ക് ചുറ്റുപാടും ഭക്തികെട്ട പ്രവര്‍ത്തികള്‍ പെരുകികൊണ്ടിരിക്കയാകുന്നു, എന്നാല്‍ നാം പിന്മാറുവാന്‍ അത് നമ്മെ ഇടയാക്കരുത്.

പകരം, നോഹയെപോലെ കൂടുതല്‍ കൂടുതല്‍ നാം കര്‍ത്താവിനോടു ചേര്‍ന്നുനില്‍ക്കണം. ഓര്‍ക്കുക, കര്‍ത്താവിന്‍റെ ദൃഷ്ടിയ്ക്ക് മറഞ്ഞിരിക്കുന്നതായി ഒന്നുമില്ല. അനുദിനവും ദൈവത്തോടു ഇങ്ങനെ നിലവിളിച്ചുകൊണ്ട് പറയുക, "കര്‍ത്താവേ, ഞാന്‍ ഒരു വിശുദ്ധ ജീവിതം നയിക്കുവാന്‍ ആഗ്രഹിക്കുന്നു. എന്നെ സഹായിക്കേണമേ, കര്‍ത്താവേ". നിങ്ങള്‍ക്കുവേണ്ടി ദൈവം തന്നെത്താന്‍ ബലവാനെന്നു കാണിക്കുവാന്‍ ഇടയാകും. നിങ്ങളുടെ ജീവിതത്തിലെ ദൈവത്തിന്‍റെ പ്രവര്‍ത്തികള്‍ നിങ്ങളുടെ ശത്രുക്കള്‍ പോലും അംഗീകരിക്കുവാന്‍ നിര്‍ബന്ധിതരാകും.

Bible Reading: Job 3-8

ശീര്‍ഷകം: ദൈവം ശ്രദ്ധിക്കുന്നു

Most Read