ಶೀರ್ಷಿಕೆ: 2026 ರ ಆರಂಭಕ್ಕಾಗಿ ಒಂದು ದೈವಿಕ ನೀಲನಕ್ಷೆ.

ಮೋಶೆಯ ಮೂಲಕ ಕಟ್ಟಲ್ಪಟ್ಟ ಗುಡಾರದ ಕುರಿತು ಬೈಬಲ್ ನಮಗೆ ಗಮನಾರ್ಹವಾದ ಮತ್ತು ಸುಲಭವಾಗಿ ಮೇಲ್ನೋಟಕ್ಕೆ ಸಿಗುವಂತ ಒಂದು ವಿವರವನ್ನು ಹೇಳುತ್ತದೆ:

“ಮೊದಲನೆಯ ತಿಂಗಳಿನ ಪ್ರಥಮದಿನದಲ್ಲಿ ನೀನು ದೇವದರ್ಶನದ ಗುಡಾರವನ್ನು ಎತ್ತಿ ನಿಲ್ಲಿಸಬೇಕು.” (ವಿಮೋಚನಕಾಂಡ 40:2).
“ಎರಡನೆಯ ವರುಷದ ಮೊದಲನೆಯ ತಿಂಗಳಿನ ಪ್ರಥಮ ದಿನದಲ್ಲಿ ಮೋಶೆ ಗುಡಾರವನ್ನು ಎತ್ತಿ ನಿಲ್ಲಿಸಿದನು.” (ವಿಮೋಚನಕಾಂಡ 40:17).

ಬೇರೆ ರೀತಿಯಲ್ಲಿ ಹೇಳುವುದಾದರೆ, ಇಸ್ರೇಲ್ ಜನರ ಮಧ್ಯದಲ್ಲಿ ತನ್ನ ವಾಸಸ್ಥಳವನ್ನು ಸ್ಥಾಪಿಸಿದ ಕ್ಷಣವನ್ನು ದೇವರು ಹೊಸ ವರ್ಷದ ದಿನವಾಗಿರಬೇಕೆಂದು ಆರಿಸಿಕೊಂಡನು. ಇದು ಆಕಸ್ಮಿಕವಲ್ಲ. ನಾವು ಜನವರಿ 1, 2026 ಕ್ಕೆ ಕಾಲಿಡುತ್ತಿರುವಾಗ ಅದು ನಮಗೆ ಉದ್ದೇಶಪೂರ್ವಕವಾಗಿ, ಪ್ರವಾದನಾ ರೀತಿಯಲ್ಲಿ ಮತ್ತು ಆಳವಾದ ಬೋಧಪ್ರದವಾಗಿದೆ.

ದೇವರು ತನ್ನ ಪ್ರಸನ್ನತೆಯಿಂದ ಪ್ರಾರಂಭಿಸ ಬಯಸುತ್ತಾನೆ.

ಗುಡಾರವು ಕೇವಲ ಒಂದು ಸಾಮಾನ್ಯ ರಚನೆಯಾಗಿರಲಿಲ್ಲ -ಬದಲಾಗಿ ಅದು ತನ್ನ ಜನರೊಂದಿಗೆ ನಿವಾಸಿಸುವ ದೇವರ ಸಾನಿಧ್ಯದ ಗೋಚರ ಸಂಕೇತವಾಗಿತ್ತು. ಇಸ್ರೇಲ್ ಜನಾಂಗವು ವಿಜಯ, ವಸಾಹತು ಅಥವಾ ವಿಸ್ತರಣೆಯಲ್ಲಿ ಮುಂದುವರಿಯುವ ಮೊದಲು, ದೇವರು ತನ್ನ ಸಾನಿಧ್ಯವು ಅಲ್ಲಿ ಪ್ರಪ್ರಥಮವಾಗಿ ಸ್ಥಾಪಿಸಲ್ಪಟ್ಟಿದೆಯೊ ಎಂಬುದನ್ನು ಖಚಿತಪಡಿಸಿಕೊಂಡನು.

ಇದು ಬಹಳ ಪ್ರಬಲವಾದ ತತ್ವವನ್ನು ಪ್ರಕಟಪಡಿಸುತ್ತದೆ:

ದೇವರು ವರ್ಷಗಳನ್ನು ಯಾವುದೋ ಒಂದು ಚಟುವಟಿಕೆಯಿಂದ ಪ್ರಾರಂಭಿಸುವುದಿಲ್ಲ; ಆತನು ಅವುಗಳನ್ನು ತನ್ನ ಪ್ರಸನ್ನತೆಯಿಂದ ಪ್ರಾರಂಭಿಸ ಬಯಸುತ್ತಾನೆ. ಶತಮಾನಗಳ ನಂತರ ಕರ್ತನಾದ ಯೇಸು ಇದೇ ಮಾದರಿಯನ್ನು ನಮಗೆ ಬೋದಿಸುತ್ತಾ,

"ಹೀಗಿರುವದರಿಂದ, ನೀವು ಮೊದಲು ದೇವರ ರಾಜ್ಯಕ್ಕಾಗಿಯೂ ನೀತಿಗಾಗಿಯೂ ತವಕಪಡಿರಿ. ಇವುಗಳ ಕೂಡ ಅವೆಲ್ಲವೂ ನಿಮಗೆ ದೊರಕುವವು." (ಮತ್ತಾಯ 6:33). ಎಂದನು.

ಆಶೀರ್ವಾದ ವರ್ಷವು ಕೇವಲ ಯೋಜನೆಗಳೊಂದಿಗೆ ಪ್ರಾರಂಭವಾಗದೆ, ದೇವರು ನಿಮ್ಮ ಜೀವನದ ಮುಖ್ಯ ಕೇಂದ್ರಸ್ಥಾನದಲ್ಲಿ ಸಿಂಹಾಸನಾರೋಹಣ ಆಗುವುದರೊಂದಿಗೆ ಪ್ರಾರಂಭವಾಗುವ ವರ್ಷವಾಗಿರಬೇಕು.

ಪವಿತ್ರ ಮರುಹೊಂದಿಕೆ

ಮೊದಲ ತಿಂಗಳು ಇಸ್ರೇಲ್‌ಗೆ ಹೊಸ ಚಕ್ರವನ್ನು ಗುರುತಿಸಿಕೊಟ್ಟಿತು. ಆ ದಿನದಂದು ಗುಡಾರವನ್ನು ಎತ್ತಿನಿಲ್ಲಿಸಬೇಕೆಂದು ಆಜ್ಞಾಪಿಸುವ ಮೂಲಕ, ಪ್ರತಿಯೊಂದು ಹೊಸ ಆರಂಭವು ಪವಿತ್ರಗೊಳಿಸಬೇಕು ಎಂಬುದನ್ನು ದೇವರು ಅವರಿಗೆ ಕಲಿಸಿಕೊಟ್ಟನು.

ಅಪೊಸ್ತಲನಾದ ಪೌಲನು ಹೊಸ ಒಡಂಬಡಿಕೆಯಲ್ಲಿ ಇದೇ ಸತ್ಯವನ್ನು ಸೆರೆಹಿಡಿಯುತ್ತಾನೆ,

“ಹೀಗಿರಲಾಗಿ ಯಾವನಾದರೂ ಕ್ರಿಸ್ತನಲ್ಲಿದ್ದರೆ ಅವನು ನೂತನಸೃಷ್ಟಿಯಾದನು. ಇಗೋ, ಪೂರ್ವಸ್ಥಿತಿ ಹೋಗಿ ಎಲ್ಲಾ ನೂತನವಾಯಿತು." (2 ಕೊರಿಂಥ 5:17).

ಹೊಸ ವರ್ಷವೆಂದರೆ ಕೇವಲ ಕ್ಯಾಲೆಂಡರನ್ನು ಬದಲಾಯಿಸುವುದಲ್ಲ - ಬದಲಾಗಿ ಇದು ದೇವರ ಉದ್ದೇಶಗಳೊಂದಿಗೆ ನಮ್ಮ ಜೀವನವನ್ನು ಸರಿಯಾಗಿ ಮರು ಹೊಂದಿಸಿಕೊಳ್ಳಲು ದೊರಕುವ ಆಹ್ವಾನವಾಗಿದೆ. ನಾವು ಮೊದಲು ಏನು ಸಮರ್ಪಿಸುತ್ತೇವೆ ಎಂಬುದೇ ಮುಂದೆ ನಾವು ಏನಾಗಲಿದ್ದೇವೆ ಎಂಬುದನ್ನು ನಿರ್ಧರಿಸುತ್ತದೆ.

ರಚನೆಯು ಮಹಿಮೆಗೆ ಮುನ್ನಡೆಸುತ್ತದೆ.

ಕರ್ತನ ಮಹಿಮೆಯು ಗುಡಾರವನ್ನು ತುಂಬುವ ಮೊದಲು (ವಿಮೋಚನಕಾಂಡ 40:34), ಮೋಶೆಯು ದೇವರ ಸೂಚನೆಗಳನ್ನು ಎಚ್ಚರಿಕೆಯಿಂದ ಅನುಸರಿಸಿದ್ದನು.

ಗುಡಾರದಲ್ಲಿ ಪ್ರತಿಯೊಂದು ಪರದೆ, ಕುಳಿ, ಬಲಿಪೀಠ ಮತ್ತು ಪೀಠೋಪಕರಣಗಳನ್ನು ಎಲ್ಲವನ್ನು ಸಹ ದೈವಿಕ ಕ್ರಮದ ಪ್ರಕಾರ ಇರಿಸಲಾಗಿತ್ತು.

ದೇವರ ಮಹಿಮೆಯು ಆತನ ಆದೇಶವನ್ನು ಗೌರವಿಸುವ ಸ್ಥಳದಲ್ಲಿ ನೆಲೆಗೊಂಡಿದೆ ಎಂಬುದನ್ನು ಇದು ನಮಗೆ ಕಲಿಸುತ್ತದೆ.

ಅಪೊಸ್ತಲ ಪೌಲನು ಕ್ರೈಸ್ತರಾದ ನಮಗೆ "ಎಲ್ಲವೂ ಸಭ್ಯವಾಗಿಯೂ ಕ್ರಮವಾಗಿಯೂ ನಡೆಯಲಿ" ಎಂದು ನೆನಪಿಸುತ್ತಾನೆ(1 ಕೊರಿಂಥ 14:40).

ನೀವು 2026 ಕ್ಕೆ ಪ್ರವೇಶಿಸುತ್ತಿದ್ದಂತೆ, ದೇವರು ನಿಮ್ಮ ಪ್ರಾರ್ಥನೆಗಳಲ್ಲಿ ಮಾತ್ರವಲ್ಲ, ನಿಮ್ಮ ನಿರ್ಧಾರಗಳು, ಶಿಸ್ತುಗಳು ಮತ್ತು ದೈನಂದಿನ ವಿಧೇಯತೆಯಲ್ಲೂ ಆಸಕ್ತಿ ಹೊಂದಿದ್ದಾನೆಎಂಬುದನ್ನು ತಿಳಿದವರಾಗಿರ್ರಿ ಯಾವಾಗಲೂ ಒಂದನ್ನು ನೆನಪಿಡಿ, ರಚನೆಯು ಮಹಿಮೆಗೆ ಜಾಗವನ್ನು ಸೃಷ್ಟಿಸುತ್ತದೆ.

ನಿಮ್ಮ ಗುಡಾರದಿಂದ ದೇವಾಲಯಕ್ಕೆ..

ಗುಡಾರವು ತಾತ್ಕಾಲಿಕವಾಗಿದ್ದಾಗಿದ್ದು, ದೇವಾಲಯವು ಶಾಶ್ವತವಾಗಿತ್ತು - ಆದರೆ ಇಂದು, ಇನ್ನೂ ಹೆಚ್ಚು ವಾಸ್ತವವಾದದ್ದಾಗಿದೆ:

"ನೀವು ದೇವರ ಆಲಯವಾಗಿದ್ದೀರೆಂದೂ ದೇವರ ಆತ್ಮನು ನಿಮ್ಮಲ್ಲಿ ವಾಸಮಾಡುತ್ತಾನೆಂದೂ ನಿಮಗೆ ಗೊತ್ತಿಲ್ಲವೋ? " (1 ಕೊರಿಂಥ 3:16).

ವರ್ಷದ ಈ ಮೊದಲ ದಿನದಂದು, ದೇವರು ನೀವು ಬಟ್ಟೆ ಮತ್ತು ಕಂಬಗಳ ಮೂಲಕ ಗುಡಾರವನ್ನು ನಿರ್ಮಿಸಬೇಕೆಂದು ಕೇಳುತ್ತಿಲ್ಲ. ಬದಲಾಗಿ ನಿಮ್ಮ ಜೀವನವನ್ನು ತನ್ನ ವಾಸಸ್ಥಳವಾಗಿ ಹೊಸದಾಗಿ ಪ್ರಸ್ತುತಪಡಿಸಬೇಕೆಂದು ಆತನು ನಿಮ್ಮನ್ನು ಆಹ್ವಾನಿಸುತ್ತಿದ್ದಾನೆ.

"ಆದದರಿಂದ ಸಹೋದರರೇ, ದೇವರ ಕನಿಕರವನ್ನು ನಿಮ್ಮ ನೆನಪಿಗೆ ತಂದು ನಿಮ್ಮನ್ನು ಬೇಡಿಕೊಳ್ಳುವದೇನಂದರೆ - ನೀವು ನಿಮ್ಮ ನಿಮ್ಮ ದೇಹಗಳನ್ನು ದೇವರಿಗೆ ಮೀಸಲಾಗಿಯೂ ಮೆಚ್ಚಿಗೆಯಾಗಿಯೂ ಇರುವ ಸಜೀವಯಜ್ಞವಾಗಿ ಅರ್ಪಿಸಿರಿ; ಇದೇ ನಿಮ್ಮ ವಿವೇಕಪೂರ್ವಕವಾದ ಆರಾಧನೆಯು."(ರೋಮನ್ನರು 12:1).

2026ಕ್ಕೆ ಪ್ರವಾದನಾ ಪೂರ್ವಕ ಆಹ್ವಾನ

ದೇವರೊಂದಿಗೆ ವರ್ಷವನ್ನು ಪ್ರಾರಂಭಿಸಿ—ಆಗ ವರ್ಷವು ನಿಮಗಾಗಿ ಏನನ್ನು ಹೊಂದಿದೆಯೋ ಅದನ್ನು ನೀವು ಬೆನ್ನಟ್ಟಬೇಕಾಗಿರುವುದಿಲ್ಲ. ದೇವರ ಪ್ರಸನ್ನತೆಯು ಮೊದಲು ಬಂದಾಗ, ಮಾರ್ಗದರ್ಶನ, ಒದಗಿಸುವಿಕೆ ಮತ್ತು ಗೆಲುವು ಇವೇ ನಿಮ್ಮನ್ನು ಹಿಂಬಾಲಿಸುತ್ತದೆ.

“ಕರ್ತನು ನಿಮ್ಮ ಮುಂದೆ ಹೋಗುವನು, ಮತ್ತು ಇಸ್ರೇಲ್‌ನ ದೇವರು ಈ ವರ್ಷವಿಡೀ ನಿಮ್ಮ ಹಿಂಬದಿಯಲ್ಲಿ ಕಾವಲುಗಾರನಾಗಿರುವನು "ಎಂದು ಯೇಸುವಿನ ಹೆಸರಿನಲ್ಲಿ, ನಾನು ಪ್ರವಾದಿಸುತ್ತೇನೆ.

ನಿಮಗೆಲ್ಲರಿಗೂ ಹೊಸ ವರ್ಷದ ಶುಭಾಶಯಗಳು.

ಶೀರ್ಷಿಕೆ: 2026 ರ ಆರಂಭಕ್ಕಾಗಿ ಒಂದು ದೈವಿಕ ನೀಲನಕ್ಷೆ.

Most Read