സങ്കീര്‍ത്തനങ്ങള്‍ 91 ഏറ്റുപറയുന്നു | Daily Confession

1. പിതാവേ, ഞാന്‍ (എന്‍റെ കുടുംബം, എന്‍റെ ശുശ്രൂഷ) അത്യുന്നതന്‍റെ മറവിൽ വസിക്കയും സർവശക്തന്‍റെ നിഴലിൻകീഴിൽ പാർക്കയും ചെയ്യുന്നതിനാല്‍ ഞാന്‍ അങ്ങേയ്ക്ക് സ്തോത്രം ചെയ്യുന്നു.

2. ഞാന്‍ ധൈര്യത്തോടെ യഹോവയെക്കുറിച്ച്: "അവൻ എന്‍റെ സങ്കേതവും കോട്ടയും ഞാൻ ആശ്രയിക്കുന്ന എന്‍റെ ദൈവവും എന്നു പറയുന്നു".

3. അവൻ എന്നെ വേട്ടക്കാരന്‍റെ കെണിയിൽനിന്നും നാശകരമായ മഹാമാരിയിൽനിന്നും തീര്‍ച്ചയായും വിടുവിക്കും.

4. തന്‍റെ തൂവലുകൾകൊണ്ട് അവൻ എന്നെ മറയ്ക്കും; അവന്‍റെ ചിറകിൻകീഴിൽ ഞാന്‍ ശരണം പ്രാപിക്കും; അവന്‍റെ വിശ്വസ്തത എനിക്ക് പരിചയും പലകയും ആകുന്നു.

5-6. രാത്രിയിലെ ഭയത്തെയും പകൽ പറക്കുന്ന അസ്ത്രത്തെയും ഇരുട്ടിൽ സഞ്ചരിക്കുന്ന മഹാമാരിയെയും ഉച്ചയ്ക്കു നശിപ്പിക്കുന്ന സംഹാരത്തെയും ഞാന്‍ പേടിക്കയില്ല.

7-8. എന്‍റെ വശത്ത് ആയിരം പേരും എന്‍റെ വലത്തുവശത്ത് പതിനായിരം പേരും വീഴും, എങ്കിലും അതു എന്നോട് അടുത്തുവരികയില്ല. എന്‍റെ കണ്ണുകൊണ്ടുതന്നെ ഞാന്‍ നോക്കി ദുഷ്ടന്മാർക്കു വരുന്ന പ്രതിഫലം കാണും.

9. ഞാന്‍ യഹോവയെ, എന്‍റെ സങ്കേതവും; അത്യുന്നതനെ എന്‍റെ വാസസ്ഥലവുമാക്കിയിരിക്കുന്നതിനാല്‍,

10. ഒരു അനർഥവും എനിക്കു ഭവിക്കയില്ല; ഒരു ബാധയും എന്‍റെ കൂടാരത്തിന് അടുക്കയില്ല.

11. എന്‍റെ എല്ലാ വഴികളിലും എന്നെ കാക്കേണ്ടതിന് അവൻ എന്നെക്കുറിച്ചു തന്‍റെ ദൂതന്മാരോടു കല്പിക്കും;

12. എന്‍റെ കാൽ കല്ലിൽ തട്ടിപ്പോകാതിരിക്കേണ്ടതിന് അവർ എന്നെ കൈകളിൽ വഹിച്ചുകൊള്ളും.

13. സിംഹത്തിന്മേലും അണലിമേലും ഞാന്‍ ചവിട്ടും; ബാലസിംഹത്തെയും പെരുമ്പാമ്പിനെയും ഞാന്‍ മെതിച്ചുകളയും.

14. ഞാന്‍ അവന്നോടു പറ്റിയിരിക്കയാൽ അവന്‍ എന്നെ വിടുവിക്കും; ഞാന്‍ അവന്‍റെ നാമത്തെ അറികയാൽ അവനെന്നെ ഉയർത്തും.

15. ഞാന്‍ അവനെ വിളിച്ചപേക്ഷിക്കും; അവനെനിക്ക് ഉത്തരമരുളും; കഷ്ടകാലത്ത് അവന്‍ എന്നോടുകൂടെ ഇരിക്കും; അവനെന്നെ വിടുവിച്ചു മഹത്ത്വപ്പെടുത്തും. ദീർഘായുസ്സുകൊണ്ട് അവനെനിക്ക് തൃപ്തിവരുത്തും; തന്‍റെ രക്ഷയെ എനിക്ക് കാണിച്ചുതരും.