വേദപുസ്തകം വായിക്കുന്നതിനു മുമ്പുള്ള പ്രാര്‍ത്ഥന | Daily Prayer

സ്നേഹമുള്ള പിതാവേ,

അങ്ങ് ജീവനുള്ള ദൈവമായിരിക്കുന്നതിനാല്‍ ഞാന്‍ അങ്ങയെ ആരാധിക്കുന്നു. അങ്ങയുടെ വചനം വായിക്കാനും, പഠിക്കാനും, ധ്യാനിക്കാനും അങ്ങ് എനിക്ക് നല്‍കിയിരിക്കുന്ന പദവിയ്ക്കായി ഞാന്‍ അങ്ങേയ്ക്ക് നന്ദി പറയുന്നു. അങ്ങയുടെ ആത്മാവിനെ എന്‍റെമേല്‍ പകരുകയും അങ്ങയുടെ വചനം എനിക്ക് അറിയിച്ചുതരികയും ചെയ്യേണമേ.

വാഴ്ത്തപ്പെട്ട പരിശുദ്ധാത്മാവേ, എന്നെ സകല സത്യത്തിലേക്കും നയിക്കേണമേ. അങ്ങയുടെ നിര്‍ദ്ദേശങ്ങളുടെ ശബ്ദം വ്യക്തമായി കേള്‍ക്കുവാന്‍ വേണ്ടി എന്‍റെ ചെവിയെ തുറക്കേണമേ. അങ്ങയുടെ വചനത്തിലൂടെ ഇന്ന് എന്നോട് സംസാരിക്കേണമേ.

നമ്മുടെ കർത്താവായ യേശുക്രിസ്തുവിന്‍റെ ദൈവവും മഹത്ത്വമുള്ള പിതാവുമായവനെ, എനിക്ക് ജ്ഞാനത്തിന്‍റെയും വെളിപ്പാടിന്‍റെയും ആത്മാവിനെ തരികയും അങ്ങയുടെ വചനത്തിലെ അത്ഭുതകരമായ കാര്യങ്ങളെ കാണേണ്ടതിനു എന്‍റെ ഹൃദയദൃഷ്ടി പ്രകാശിപ്പിക്കുകയും ചെയ്യേണമേ.

അങ്ങയുടെ വചനം എന്‍റെ ജീവിതത്തിന്‍റെ ഭാഗമായി മാറുകയും കര്‍ത്താവായ യേശുക്രിസ്തുവിന്‍റെ സാദൃശ്യത്തിലും സ്വഭാവത്തിലുമുള്ള ഒരു പുതിയ വ്യക്തിയാക്കി എന്നെ രൂപാന്തരപ്പെടുത്തുകയും ചെയ്യേണമേ. അങ്ങയുടെ വചനം നൂറുമേനി ഫലം കായ്ക്കുന്നതില്‍ നിന്നും തടയുന്ന എന്തും എന്‍റെ ജീവിതത്തില്‍ നിന്നും, എന്‍റെ കുടുംബാംഗങ്ങളില്‍ നിന്നും, എന്‍റെ ചുറ്റുപാടുകളില്‍ നിന്നും വേരോടെ പിഴുതുപോകട്ടെ.

പാപത്തിന്മേലും, ലോകത്തിന്മേലും, പിശാചിന്മേലും ഞാന്‍ ജയംപ്രാപിച്ച് ജീവിക്കേണ്ടതിനു അങ്ങയുടെ വചനം എന്‍റെ ഹൃദയത്തില്‍ സംഗ്രഹിക്കാന്‍ എന്നെ സഹായിക്കേണമേ.

അങ്ങയുടെ വചനംപോലെ എനിക്ക് ഭവിക്കട്ടെ. കര്‍ത്താവേ സംസാരിക്കേണമേ, അങ്ങയുടെ ദാസന്‍ കേള്‍ക്കുന്നുണ്ട്. യേശുവിന്‍റെ നാമത്തില്‍ ഞാന്‍ പ്രാര്‍ത്ഥിക്കുന്നു. ആമേന്‍.

[ഇപ്പോള്‍ കുറച്ചുസമയങ്ങള്‍ അന്യഭാഷയില്‍ പ്രാര്‍ത്ഥിക്കുക].

തിരുവചന ഭാഗങ്ങള്‍:

[സദൃശ്യവാക്യങ്ങള്‍ 1:23; യോഹന്നാന്‍ 16:13; വെളിപ്പാട് 3:22; എഫെസ്യര്‍ 1:17-18; റോമര്‍ 12:2; മത്തായി 15:13; സങ്കീര്‍ത്തനങ്ങള്‍ 119:11; ലൂക്കോസ് 1:38; 1ശമുവേല്‍ 3:10].