അധ്യായം 6

"നോക്കുക ഞാൻ യെരീഹോവിനെ നിന്‍റെ കൈയിൽ ഏല്പിച്ചിരിക്കുന്നു. . . " ഈ പദപ്രയോഗം ശ്രദ്ധേയമാണ്; ദൈവം പറയുന്നു, "ഞാന്‍ ഏല്‍പ്പിച്ചിരിക്കുന്നു", അല്ലാതെ "ഞാന്‍ ഏല്‍പ്പിക്കും"  എന്നല്ല.

അത്തരമൊരു പ്രഖ്യാപനം യുക്തിസഹമായ മനസ്സിന് അസാധാരണമായി തോന്നിയേക്കാം. യെരിഹോവിന്‍റെ മതിലുകള്‍ അപ്പോഴും ഉയര്‍ന്നു നിന്നിരുന്നു, അതിന്‍റെ നഗര കവാടങ്ങള്‍ സുരക്ഷിതമായി അടച്ചിരുന്നു, യിസ്രായേല്‍ അതിനെ പിടിച്ചടക്കുന്നത് പൂര്‍ത്തിയാക്കി എന്നതിന്‍റെ ഭൌതീക തെളിവുകളുടെ യാതൊരു സൂചനയും ഉണ്ടായിരുന്നില്ല. എന്നിരുന്നാലും, ആത്മീയ മണ്ഡലത്തില്‍, വിജയം കൈവരിച്ചു കഴിഞ്ഞിരുന്നു. ഈ ആത്മീയ തത്വത്തില്‍ ഓരോ വിശ്വാസിക്കും അനിവാര്യമായിരിക്കുന്ന ഒരു സന്ദേശമുണ്ട്. നമ്മുടെ വിജയങ്ങളുടെ ഉറപ്പ് ആരംഭിക്കുന്നത് ദൈവം ആത്മീക മണ്ഡലത്തില്‍ ഇതിനകം നിശ്ചയിച്ചിട്ടുള്ള കാര്യങ്ങള്‍ തിരിച്ചറിയുന്നതില്‍ കൂടിയാകുന്നു.

ഈ സന്ദര്‍ഭത്തില്‍, "നോക്കുക" എന്ന നിര്‍ദ്ദേശം ശാരീരിക കാഴ്ച്ചയെ സംബന്ധിച്ച് കുറച്ചും ആത്മീക ഉള്‍കാഴ്ചയെ സംബന്ധിച്ച് അധികമായും സംസാരിക്കുന്നു. നമ്മുടെ ശ്രദ്ധ മാറ്റുവാന്‍ ഇത് നമ്മെ പ്രേരിപ്പിക്കയും, ആഴമായ ഒരു അറിവിന്‍റെ മണ്ഡലത്തിലേക്ക് നമ്മെ വിളിക്കയും ചെയ്യുന്നു. വേദപുസ്തകപരമായി കാണുന്നതിന്‍റെ യാഥാര്‍ത്ഥമായ സാരാംശം, ധാരണ, ഉള്‍കാഴ്ച, ശ്രദ്ധ, ആത്മീയ സംവേദനക്ഷമത എന്നിവയിലാകുന്നു ഇരിക്കുന്നത്. വിജയങ്ങള്‍ ഭൌതീകമായി പ്രകടമാകുന്നതിനു മുമ്പുതന്നെ അതിനെ പ്രതീക്ഷിക്കുവാന്‍ ഈ കാഴ്ചപ്പാട് നമ്മെ അനുവദിക്കുന്നു. ആത്മീയ മണ്ഡലത്തില്‍ നിന്നും ദര്‍ശനങ്ങള്‍ ഗ്രഹിക്കുന്നവര്‍ക്ക്‌ അസാധാരണമായ ഒരു കഴിവുണ്ട്: സ്വാഭാവീക മണ്ഡലത്തില്‍ അസാധ്യമെന്നു തോന്നുന്ന കാര്യങ്ങള്‍ നേടിയെടുക്കുവാന്‍ അവര്‍ക്ക് സാധിക്കും.

അടിസ്ഥാനപരമായി നമ്മുടെ യുദ്ധങ്ങള്‍ ആത്മീകമാണെന്ന ആശയത്തെ യോശുവയുടെ ചരിത്രം ശക്തിപ്പെടുത്തുന്നു. ഈ വിവരണത്തില്‍ നിന്നും അംഗീകരിക്കാവുന്ന പ്രധാനപ്പെട്ട രണ്ടു കാര്യങ്ങള്‍ വ്യക്തമാകുന്നുണ്ട്:

യോശുവയും യിസ്രായേല്‍ മക്കളും പരമ്പരാഗത പോരാട്ടത്തില്‍ ഏര്‍പ്പെടേണ്ടതായി വന്നില്ല. പോരാടുവാന്‍ യുദ്ധം അവരുടേതായിരുന്നില്ല; അത് കര്‍ത്താവിന്‍റെതായിരുന്നു. ഇത് മനുഷ്യന്‍റെ യുക്തിയെ ധിക്കരിക്കുന്നതാണ്. വാളുകള്‍ തമ്മില്‍ പോരാടുന്നില്ല, തന്ത്രങ്ങള്‍ മെനയപ്പെടുന്നില്ല - വിജയം തങ്ങളുടേതായി മാറിക്കഴിഞ്ഞു എന്ന ദൈവീകമായ ഉറപ്പുമാത്രം. 

2. ആരാധന ഒരു ആയുധമാണ്: ഉയര്‍ന്നു നില്‍ക്കുന്ന മതിലുകള്‍ക്കും ശക്തരായ എതിരാളികള്‍ക്കും മുന്നില്‍, യിസ്രായേല്‍ ജനം ആരാധിച്ചു. പുറമേനിന്നുള്ള ഒരു വ്യക്തിയ്ക്ക്, നഗരത്തിന്‍റെ മതിലുകള്‍ക്ക് ചുറ്റുമായി ആരാധന നടത്തുന്ന അവരുടെ പ്രവൃത്തി വെറും വിഡ്ഢിത്തമായി തോന്നിയേക്കാം. എന്നാല്‍ ദൈവത്തിന്‍റെ ദൃഷ്ടിയില്‍ അവരുടെ ആരാധന നല്ല സുഗന്ധമുള്ള ഒരു വഴിപാടായിരുന്നു. അവരുടെ വിശ്വാസവും അനുസരണവും മൂലം സ്തുതി എന്ന പ്രവൃത്തി യുദ്ധത്തിനുള്ള ശക്തമായ ഒരു ആയുധമായി മാറി.

നമ്മുടെ ജീവിതവും സമാന്തരമായി നോക്കിയാല്‍, നമുക്കും 'മതിലുകള്‍' ഉണ്ടാകും - അതിജീവിക്കുവാന്‍ കഴിയുകയില്ലെന്ന് തോന്നുന്ന ഭീമാകാരമാകുന്ന വെല്ലുവിളികള്‍ വരാം. സാമ്പത്തീകമായ പ്രശ്നങ്ങള്‍, ആരോഗ്യകരമായ പ്രതിസന്ധികള്‍, ബന്ധങ്ങളിലെ തകര്‍ച്ച - ഇതെല്ലാം നമ്മുടെ വ്യക്തിപരമായ യെരിഹോകളാണ്. പ്രധാനപ്പെട്ടത് നമ്മുടെ ധാരണയാകുന്നു. യോശുവയെപോലെ, നമ്മുടെ വിജയം ഇരിക്കുന്നത് തടസ്സങ്ങളില്‍ ശ്രദ്ധ കേന്ദ്രീകരിക്കുന്നതിലല്ല, മറിച്ച് ദൈവത്തിന്‍റെ വീക്ഷണവുമായി പൊരുത്തപ്പെടുന്നതില്‍ ആകുന്നുവെന്ന് തിരിച്ചറിഞ്ഞുകൊണ്ട്, ഈ മതിലുകള്‍ക്ക് അപ്പുറത്തുള്ളത് കാണുവാന്‍ നാം പഠിക്കണം. 

വിശ്വാസികള്‍ കാണുന്നതിനെയല്ല, കാണാത്തതിലും നിത്യമായതിലും ശ്രദ്ധ കേന്ദ്രീകരിക്കുവാന്‍ പ്രേരിപ്പിച്ചുകൊണ്ട്, അപ്പോസ്തലനായ പൌലോസ് 2 കൊരിന്ത്യര്‍ 4:18ല്‍ ഈ വികാരത്തെ പ്രതിധ്വനിപ്പിക്കുന്നു. പെട്ടെന്നുള്ള, താല്‍ക്കാലികമായ, 'കാണുന്ന' കാര്യങ്ങളാല്‍ പലപ്പോഴും നമ്മുടെ മാനുഷീക പ്രകൃതം താഴ്ന്നുപോകുന്നു. എന്നാല്‍ ഒരു വിശ്വാസ ജീവിതം വേരൂന്നിയിരിക്കുന്നത് 'അദൃശ്യമായതിലാണ്' - അത് നാം അഭിമുഖീകരിക്കുന്ന ഏതൊരു താല്‍ക്കാലിക സാഹചര്യത്തെക്കാളും യാഥാര്‍ഥ്യമായ ദൈവത്തിന്‍റെ ശാശ്വതമായ വാഗ്ദാനങ്ങള്‍ ആകുന്നു. 

ഈ വിശ്വാസ ജീവിതം വെറുമൊരു നിര്‍ദ്ദേശമല്ല; അത് ഒരു ദൈവീക ആവശ്യമാണ്‌. റോമര്‍ 1:17 ല്‍ ഇപ്രകാരം പറയുന്നു, "നീതിമാന്‍ വിശ്വാസത്താല്‍ ജീവിക്കും". 2 കൊരിന്ത്യര്‍ 5:7ല്‍ പരാമര്‍ശിച്ചിരിക്കുന്നതുപോലെ, കാഴ്ചയാലല്ല, വിശ്വാസത്താലത്രേ നടക്കുന്നത്, അത് നമ്മുടെ അടിയന്തരമായ സാഹചര്യങ്ങള്‍ക്ക് അപ്പുറത്തേക്കും ദൈവത്തിന്‍റെ വാഗ്ദാനങ്ങളിലേക്കും നോക്കുവാന്‍ നമ്മെ പ്രേരിപ്പിക്കുന്നു.

നമ്മുടെ ആധുനീക സാഹചര്യത്തില്‍, നമ്മുടെ ആത്മീക യാത്രയില്‍ വെല്ലുവിളികള്‍ ഉയര്‍ന്നുവരുമ്പോള്‍, കൂട്ടായുള്ള ആരാധനയില്‍ നിന്നും അകന്നുനില്‍ക്കുന്നത് അവരുടെ സാഹചര്യങ്ങളെ മുഴുവന്‍ എങ്ങനെയെങ്കിലും മാറ്റിമറിക്കും എന്ന് ഒരുപക്ഷേ ചിന്തിച്ചുകൊണ്ട്‌, വിശ്വാസികള്‍ പിന്മാറുന്നത് അസാധാരണമായ കാര്യമല്ല. എന്നാല്‍ യെരിഹോവിന്‍റെ ചരിത്രം നിര്‍ദ്ദേശിക്കുന്നതുപോലെ, ആ പ്രതികൂല നിമിഷങ്ങളില്‍ നാം ദൈവത്തില്‍ നിന്നും അകലുകയല്ല, മറിച്ച് കൃത്യമായി ദൈവത്തോട് അടുക്കുകയാണ് വേണ്ടത്.

യെരിഹോ കേവലം മറ്റൊരു നഗരമായിരുന്നില്ല; യിസ്രായേല്‍ മക്കള്‍ വാഗ്ദത്ത ദേശത്ത്‌ പ്രവേശിച്ചപ്പോള്‍ ഇത് അവര്‍ ആദ്യമായി കീഴടക്കിയ പട്ടണമായിരുന്നു. വരുവാനിരിക്കുന്ന വിജയങ്ങള്‍ക്ക് മുന്നോടിയായും അതിന്‍റെ ശബ്ദമായും, ഒരു ആദ്യഫല വഴിപാടിനോട് ഇതിനെ സാദൃശ്യപ്പെടുത്താം - ദൈവീകമായ ഒരു യാത്രയുടെ ശക്തമായ ഒരു തുടക്കം.