ആത്മീക വളര്‍ച്ചയെ നിശബ്ദമായി അമര്‍ത്തുന്നത്

വചനത്തോടുള്ള വ്യത്യസ്തമായ പ്രതികരണങ്ങളെ വിവരിക്കുന്ന ആഴമായ ഒരു ഉപമ മര്‍ക്കോസ് 4:13-20 വരെയുള്ള ഭാഗത്ത് യേശു പങ്കുവെക്കുന്നുണ്ട്. ഈ തിരുവചനങ്ങള്‍ നാം ആഴമായി ചിന്തിക്കുമ്പോള്‍, നമ്മുടെ ആത്മീക വളര്‍ച്ചയെ തടസ്സപ്പെടുത്തുന്ന പ്രധാനപ്പെട്ട കുറ്റവാളികളില്‍ ഒന്നാണ് വ്യത്യസ്ത രൂപത്തിലുള്ള വ്യതിചലനങ്ങള്‍ എന്ന് വ്യക്തമാണ്.

കര്‍ത്താവായ യേശു അത് വിശദമാക്കിക്കൊണ്ട് ആരംഭിക്കുന്നു, "വിതയ്ക്കുന്നവൻ വചനം വിതയ്ക്കുന്നു" (മര്‍ക്കോസ് 4:14). ഈ വചനം സത്യമാണ്, സുവിശേഷമാണ്, ദൈവത്തിന്‍റെ ജീവന്‍ നല്‍കുന്ന വാഗ്ദാനമാണ്. എന്നിരുന്നാലും, വിതയ്ക്കുന്നതിന്‍റെ ഫലം എല്ലായിപ്പോഴും നാം പ്രതീക്ഷിക്കുന്ന ഫലവത്തായ കൊയ്ത്ത് ആയിരിക്കയില്ല.

എടുത്തുകളയുന്ന വചനം:

"ചില ആളുകള്‍ വഴിയരികെ വിതയ്ക്കപ്പെട്ട വിത്തുപോലെയാണ്, വചനം വിതച്ചിട്ടു വഴിയരികെ വീണത്, കേട്ട ഉടനെ സാത്താൻ വന്നു ഹൃദയങ്ങളിൽ വിതയ്ക്കപ്പെട്ട വചനം എടുത്തുകളയുന്നതാകുന്നു". (മര്‍ക്കോസ് 4:15). എത്രയോ പ്രാവശ്യം നാം ഒരു പ്രസംഗം കേള്‍ക്കുകയും, ഹൃദയത്തില്‍ തള്ളല്‍ അനുഭപ്പെടുകയും, നാം വീട്ടില്‍ എത്തുന്ന സമയംകൊണ്ട് അതിന്‍റെ അന്തസത്ത മറന്നുപോകുകയും ചെയ്യുന്നു? നമ്മുടെ ഹൃദയത്തിലേക്കുള്ള വഴി കണ്ടെത്തുന്ന സത്യത്തിന്‍റെ ഏതൊരു രൂപത്തേയും തട്ടിയെടുക്കുവാന്‍ ശത്രു എപ്പോഴും നിരീക്ഷിച്ചുകൊണ്ടിരിക്കുന്നു.

പാറസ്ഥലത്തെ വചനം:

"അങ്ങനെതന്നെ പാറസ്ഥലത്തു വിതച്ചതു വചനം കേട്ട ഉടനെ സന്തോഷത്തോടെ കൈക്കൊള്ളുന്നവർ; എങ്കിലും അവർ ഉള്ളിൽ വേരില്ലാതെ ക്ഷണികന്മാർ ആകുന്നു; വചനം നിമിത്തം ഉപദ്രവമോ പീഡയോ ഉണ്ടായാൽ ക്ഷണത്തിൽ ഇടറിപ്പോകുന്നു" (മര്‍ക്കോസ് 4:16-17). ഒരു ആരാധനാ സമയത്തോ അല്ലെങ്കില്‍ ഒരു ആത്മീയ കൂടിവരവിലോ വൈകാരികമായ ഒരു ഉയര്‍ച്ച അനുഭവപ്പെടുന്നത് അസാധാരണമല്ല. എങ്കിലും,ക്രിസ്തുവില്‍ വേരുകള്‍ ആഴത്തില്‍ ഇറങ്ങാതെ, ഈ സന്തോഷം ക്ഷണികമായിരിക്കും. വെല്ലുവിളികള്‍ അഭിമുഖീകരിക്കുമ്പോള്‍, നമ്മുടെ വിശ്വാസം ചഞ്ചലപ്പെടാം. യെശയ്യാവ് 40:8 പറയുന്നതുപോലെ, "പുല്ലുണങ്ങുന്നു, പൂ വാടുന്നു; നമ്മുടെ ദൈവത്തിന്‍റെ വചനമോ എന്നേക്കും നിലനില്ക്കും". നിലനില്‍ക്കുന്ന വിശ്വാസമാണ് ദൈവത്തിന്‍റെ നിത്യമായ വചനത്തില്‍ ആഴമായി വേരിറങ്ങിയ വിശ്വാസം.

ഞെരുക്കപ്പെട്ട വചനം:

ഇവിടെയാണ്‌ വ്യതിചലനങ്ങള്‍ അവയുടെ ഏറ്റവും തന്ത്രപരമായ പങ്കു വഹിക്കുന്നത്. "ഇഹലോകത്തിന്‍റെ ചിന്തകളും ധനത്തിന്‍റെ വഞ്ചനയും മറ്റു വിഷയമോഹങ്ങളും അകത്തു കടന്ന്, വചനത്തെ ഞെരുക്കി നിഷ്ഫലമാക്കി തീർക്കുന്നതാകുന്നു". (മര്‍ക്കോസ് 4:19). വ്യതിചലനങ്ങള്‍ എല്ലായിപ്പോഴും ഗംഭീരമായതോ തിളക്കമുള്ളതോ അല്ല. അവ "ഇഹലോകത്തിന്‍റെ ചിന്തകളും" അല്ലെങ്കില്‍ "ധനത്തിന്‍റെ വഞ്ചനയും" പോലെ സൂക്ഷ്മമായത് ആയിരിക്കും. അത് ദൈവത്തിന്‍റെ അംഗീകാരത്തിനു മേലുള്ള ലൌകീക സാധൂകരണങ്ങളുടെ നിശബ്ദമായ അന്വേഷണമായിരിക്കാം. സദൃശ്യവാക്യങ്ങള്‍ 23:4 ഇങ്ങനെ മുന്നറിയിപ്പ് നല്‍കുന്നു, "ധനവാനാകേണ്ടതിനു പണിപ്പെടരുത്; അതിനായുള്ള ബുദ്ധി വിട്ടുകളക".

ആംപ്ലിഫൈഡ് ബൈബിള്‍ കൂടുതലായി വിശദീകരിക്കുന്നു, വ്യതിചലനങ്ങളെ ഇപ്രകാരം പ്രദര്‍ശിപ്പിക്കുന്നു, "ഇഹലോകത്തിന്‍റെ ആഹ്ളാദവും ആനന്ദവും തെറ്റായ ആകര്‍ഷണവും, ധനത്തിന്‍റെ വഞ്ചനയും മറ്റു വിഷയമോഹങ്ങളും, ആവേശവും ആസക്തിയും". (മര്‍ക്കോസ് 4:19). ഈ ആഗ്രഹങ്ങള്‍ കടന്നുവരുമ്പോള്‍, അവ നമ്മുടെ ആത്മീക വളര്‍ച്ചയെ ശ്വാസം മുട്ടിക്കുന്നു. 1 യോഹന്നാന്‍ 2:15-17 വരെയുള്ള ഭാഗം നമ്മെ ഇപ്രകാരം ഓര്‍മ്മിപ്പിക്കുന്നു, "ലോകത്തെയും ലോകത്തിലുള്ളതിനെയും സ്നേഹിക്കരുത്. ഒരുവൻ ലോകത്തെ സ്നേഹിക്കുന്നു എങ്കിൽ അവനിൽ പിതാവിന്‍റെ സ്നേഹം ഇല്ല".

ഫലവത്തായ വചനം:

എന്നാല്‍, സകല പ്രതീക്ഷകളും നഷ്ടപെട്ടിട്ടില്ല. യേശു ചിലരെക്കുറിച്ച് പറയുന്നു "നല്ല മണ്ണിൽ വിതയ്ക്കപ്പെട്ടതോ വചനം കേൾക്കയും അംഗീകരിക്കയും ചെയ്യുന്നവർ തന്നെ; അവർ മുപ്പതും അറുപതും നൂറും മേനി വിളയുന്നു" (മര്‍ക്കോസ് 4:20). ഇവിടുത്തെ പ്രധാനപ്പെട്ട കാര്യം നല്ല മണ്ണ് എന്നതാണ്. താഴ്മയും പ്രാര്‍ത്ഥനയും കൊണ്ട് ഉഴുതുമറിച്ച, ഒരുക്കിയെടുക്കപ്പെട്ട ഒരു ഹൃദയം, വചനം കേള്‍ക്കുക മാത്രമല്ല മറിച്ച് സ്വീകരിക്കുവാനും അതിനനുസരിച്ച് പ്രവര്‍ത്തിക്കുവാനും തയ്യാറുള്ള ഒരു ഹൃദയം.

വ്യതിചലനങ്ങളെ അതിജീവിക്കുക:

യാക്കോബ് 4:7-8 വരെയുള്ള ഭാഗം നിര്‍ദ്ദേശിക്കുന്നു, "ആകയാൽ നിങ്ങൾ ദൈവത്തിനു കീഴടങ്ങുവിൻ; പിശാചിനോട് എതിർത്തുനില്പിൻ; എന്നാൽ അവൻ നിങ്ങളെ വിട്ട് ഓടിപ്പോകും. ദൈവത്തോട് അടുത്തു ചെല്ലുവിൻ; എന്നാൽ അവൻ നിങ്ങളോട് അടുത്തുവരും". ഇത് വിശ്വാസത്തോടുള്ള സജീവമായ ഒരു സമീപനമാണ്. വ്യതിചലനങ്ങള്‍ തിരിച്ചറിയുകയും ചെറുത്തുനില്‍ക്കുകയും അതുപോലെ ദൈവത്തോട് അടുക്കുകയും ചെയ്യുന്നതിലൂടെ, നാം ഫലഭുയിഷ്ഠമായ, ഫലം കായ്ക്കുവാന്‍ തയ്യാറായ നല്ല മണ്ണുപോലെ ആയിത്തീരുന്നു.

എബ്രായര്‍ 12:2 ലെ വചനം നമുക്ക് അനുസരിക്കാം, "വിശ്വാസത്തിന്‍റെ നായകനും പൂർത്തി വരുത്തുന്നവനുമായ യേശുവിനെ നോക്കുക". വ്യതിചലനങ്ങളാല്‍ നിറഞ്ഞിരിക്കുന്ന ഈ ലോകത്ത്, നമ്മുടെ നിത്യപ്രത്യാശയും രക്ഷയുമായ ക്രിസ്തുവില്‍ നമ്മുടെ നോട്ടം ഉറച്ചിരിക്കട്ടെ.

ആത്മീക വളര്‍ച്ചയെ നിശബ്ദമായി അമര്‍ത്തുന്നത്

Most Read